BREASTANBUL 2026

GüclüSən

PAŞA Həyat Sığortanın süd vəzi xərçənginə qarşı maarifləndirmə icması “GüclüSən” çərçivəsində təşkil olunan tədbirdə tibb ekspertləri sırasında iştirak etdik. Tədbirdə süd vəzi xərçəngi diaqnozu qoyulan qadınlara maliyyə dəstəyi verən yeni “GüclüSən” sığorta məhsulu təqdim olundu. Bu məhsul diaqnoz zamanı qadına 30 000 manat ödəniş edir, bu vəsaiti istənilən ölkədə və klinikada müalicəyə yönəltmək mümkündür. Biz də öz növbəmizdə erkən diaqnostikanın, müntəzəm müayinənin və maarifləndirmənin önəmini vurğuladıq. Vaxtında aşkarlanan süd vəzi xərçəngi yüksək müalicə şansı deməkdir. Qadın sağlamlığına dəstək olan bu cür təşəbbüslərin bir parçası olmaq bizim üçün dəyərlidir. Sən güclüsən!

Ginekologiyada yeni üfüqlər

3–4 oktyabr 2026-cı il tarixlərində Bakıda, Hyatt Regency otelində keçirilən “Sağlam Qadın – Sağlam Nəsil: Ginekologiyada yeni üfüqlər” I Beynəlxalq Konfransında məruzəçi kimi iştirak etdik. Qadın sağlamlığı, ginekologiya və reproduktiv tibb sahəsində çalışan həkimləri bir araya gətirən bu konfransda iki gün ərzində müasir diaqnostika və müalicə yanaşmaları, yeni elmi nailiyyətlər və klinik təcrübədə qarşılaşdığımız aktual məsələlər müzakirə olundu. Tədbir 20 DTT krediti ilə akkreditə olunmuşdu. Çıxışımızda süd vəzisi sağlamlığı və xəstəliklərin erkən aşkarlanması mövzusunda klinik təcrübəmizi həmkarlarımızla bölüşdük. Süd vəzisinin sağlamlığı qadın sağlamlığının ayrılmaz hissəsidir. Ginekoloq və mammoloqların birgə işi xəstəliklərin vaxtında aşkarlanmasında mühüm rol oynayır. Belə mötəbər elmi platformada bilik və təcrübəmizi bölüşmək bizim üçün yadda qalan oldu.

Mən Qalib Gəldim

Süd vəzi xərçəngini yenmiş qadınları “Mən Qalib Gəldim” konseptli səhər yeməyində bir araya gətirdik. Səmimi söhbət şəklində keçən görüşdə xanımlar diaqnozdan sağalmağa qədər keçdikləri yolu, qarşılaşdıqları çətinlikləri, yaxınlarının dəstəyini və gündəlik həyata qayıdışlarını bölüşdülər. Bu hekayələr bir daha göstərdi ki, mənəvi dəstək və ümid müalicə qədər vacibdir. Görüşdə vurğuladıq ki, süd vəzi xərçəngi qadına həm fiziki, həm də emosional təsir göstərir. Tibbi imkan olduqda süd vəzisini qorumaq, qadının həyat keyfiyyətini və özünəinamını qoruyub saxlamaq bizim üçün əsas prioritetdir. Süd vəzisində hər hansı dəyişiklik hiss edildikdə vaxt itirmədən mütəxəssisə müraciət etmək çox vacibdir. Bu görüş oktyabr — Süd Vəzi Xərçəngi Maarifləndirmə Ayı çərçivəsində planlaşdırdığımız layihələrin ilk addımı oldu. Görüşün sonunda iştirakçılara ümid və yeni başlanğıc rəmzi olaraq ağ güllər hədiyyə etdik. Heç bir xanım süd vəzisini itirməsin.